رمضان وحملي فيكي

من 10 ايام بللش رمضان وطبعاً انا مصرة أصومه كلله ان شاء الله
مع اني بحزن عليكي بتكون حركاتك خفيفة في النهار من الجوع وبس أفطر بتعملي حفلة جوا.. يا حبيبة قلبي

اول يوم افطرنا انا وبابا عند دار سيدو ابو ايمن وانبسطنا كتيـــــــر.. بتعرفي شو احلى اشي كان في لقاءنا هاد؟
اني شفت اغراضك واواعيكي اللي تيتا بعتتلك ياهم من الاردن.. بجننوا يا ماما رح اصورلك ياهم ان شاء الله واحطهم مشان تشوفيهم بس تكبري..

مشتاقيتلك يا راما كتير.. الله يحميكي يارب ويفرحني فيكي.. ويسهل ولادتك
خايفة كتير من الولادة بس اللي مهون عليي اني قربت احضنك يا قطعة من قلبي.. احلى ما فيكي انك قطعة من احسن أب في الدنيا.. اللي بحبك كتير وبيضل يحكي معك ويلاعبك وانتي ببطني..
وامبارح واحنا بنصللي قيام ليل دعالك يا راما .. من هلا صار يدعيلك باباتك يا عيوني.. عنجد مبسوط فيكي كتير باباتك بضل يحكيلي طولت راما خلليها تيجي بسرعة..
كلنا مشتاااااااااااااقينلك يا حياتي..

هدايا تيتا لأحلى راما

الفتره هاي يعني بالشهر السادس عادة الناس بتبللش اتجهز للبيبي.. بس انا حبيت انو تيتا ام بابا اتجهزلك اغراضك
لأنها كتير بتحبك وكان نفسها وهيي هون اتجهز معي أغراضك بس ما صار مجال فجهزتلك من الأردن بس رجعت..
وبعتتهم مع أهلي.. وخالو اللي بحبك هو اللي نقلهم من بيت تيتا لبيت أهلي.. أنا لسه ماشفتهم الأغراض حتى تيتا أم ماماتك لسه ما فتحتهم بعد بكرا ان شالله رح يوصلوا ع الامارات دار سيدو أبو ماما وأشوفهم وأشوف أغراضك.. مشتااااااقة كتير أتفرج ع أواعيكي يا راما ومشتاقة أكتر ألبسك ياهم..

راما المنبه اليومي الصبح

كل يوم الصبح صايرة حبيبتي راما اتصحيني بحركاتها وركلاتها الترجيحية.. حضرتك خايفة يطلع باباتك حبيبك بدون فطور.. بس يرن المنبه الصبح بكون صاحية بسببك أصلاً يعني مش محتاجة منبه يصحيني..
وطبعاً غير لما أغلط وأنام ع بطني بتدفشيني دفشات بتخلليني أحرم أقلب ع بطني طول الوقت.. بس أحياناً لما اتطولي غيبتك عني وبوكساتك المحببين لقلبي بنام ع بطني مشان تصحي وتلعبي معي لعبتنا..

عنجد أنا كتير بحبك يا راما انتي وأبوكي أغلى ناس في الدنيا ع قلبي.. ربي لا يحرمني منكم يارب..

ماما والكبدة

بأخر زيارة للدكتورة فحصتلي قوة الدم وطلع دمي نازل شوي.. وطبعاً بابا بخاف عليي وعليكي كتير كل يوم بجيبلي كبدة وبحكيلي أوكل منها .. أنا ما كنت أحب الكبدة بس مشانك صرت اوكلها..

غيرتي كتيــــر بعاداتي الغذائية انتي وبابا وتيتا كمان.. فيه كتيـــــــــــــر اكلات ما كنت ادوقهم صرت اتقبلهم.. وتيتا علمتني كل يوم لازم اوكل تفاحه او اي نوع فواكه مشان ما يصير عندك نقص باي نوع فيتامينات.. وصرت اشرب ع الاقل كاسة حليب كل يوم.. كللو مشان يا احلى بنوتة بالعالم..

ذكريات من بداية حملي فيكي..

فترة الوحام

فترة الوحام كانت من أصعب أيام الحمل.. واستمرت معي خمس شهور تقريباً..
كنت ما أقدر آكل إشي.. ودايماً مرهقة وتعبانة ومرمية في السرير..

بس مرت أيام اتوحمت فيها ع أشياء غريبة.. مرة إجا ع بالي حمص بليلة.. ههههههههههههه يومها أبوكي انصدم كتير.. وحكالي يمكن مافي مطعم بكل الامارات ببيع بليلة..

وجابلي حمص حب بس ما عملتو من الكسل وتاني يوم عزمني ع مطعم لبناني وطلبنا منو بليلة ولقينا عنده يومها سبحان الله..

بتعرفي راما أبوكي أروع انسان ع وجه الأرض عمري ما طلبت منه شغلة وحرمني منها الله يخلليلنا ياه يارب.. وكتيـــــــــــــــــــــــــــــــــــر بخاف عليي وعليكي كمان..دايما بحكيلي أدير بالي ع اكلي مشاني ومشانك عشان اتكوني بنت حلوة وقوية وبتجنن.. زي ما أنا متأكدة إنك فعلا حلوة وبتجنني..

كمان كان ييجي ع بالي دايماً شيبس صحار

كنت أحب أعمله ساندويش مع لبنة وخبز صمون يم يم .. سال لعابي إجا ع بالي كمان مرة.. لااااا بس هلا أنا خلصت وحام هلا انا بالشهر السادس يعني صرت قوية ولازم أحافظ ع أكلي..

طبعاً كل صورك اللي كنا نعملهم عند دكتورتي اللي براجع عندها محتفظة فيها.. رح أفرجيكي ياهم بمرة لحالهم..

اممممممممم شو كمان بدي أحكيلك.. آه كمان كنت دايما أطلب سينابون أنا بحبه كتير

حتى لو كنت مش قادرة أحط شغلة بتمي بس اذا حضر السينابون خلص بصير بقدر آكل..

جية تيتا عندنا ع أبوظبي

قبل حوالي أسبوع روحت تيتك أم بابا من عنا قعدت عندنا عشرين يوم بالزبط بس كانوا أيام حلويييييييييين كتير

حاولت اتعلمني أعمللك أواعي بالصوف والسنارة"كروشيه" بس ماعرفت.. بس هيي عملتلك أشياااااء كتير حلوة..

أهمهم هاد الفستان اللي ان شاء الله رح ألبسك ياه ع عيد الأضحى اذا ضل موعد ولادتك زي ما بتحكي الدكتورة ب24-11-2009

طبعاً كنتي اتحبي صوت تيتا كتيــــر بس اتكون بتحكي معي كأنك كنت اتميزي صوتها اتصيري تتحركي حركات كتير واضحة زي كأنك بترقصي ببطني..

رقصات ودبكات القمر راما

حركاتك هاي قربت مابيني وبينك كتير ياراما.. صار في بيني وبينك لغة تخاطب معينة بس أشتاقلك وأحسس ع بطني بطريقة معينة كنتي اتردي عليي بركلة أو رقصة حلوة وبابا كمان كان يلاعبك مرات هاي اللعبة.. بس مش دايماً بتردي عليه أعتقد إنك بتكوني نايمة بس يلاعبك حبيبك بابا..

يومياً كنت اتابع تطوراتك في بطني عن طريق هاد الشريط..

طبعاً زي ما امبين بالشريط انتي هلا بالاسبوع ال24 و6 أيام بعد أسبوعين بتدخلي المربع السابع يعني بصير بالشهر السابع ورح اتكون الدنيا رمضان مش عارفة شو رح يصير في رمضان بس ان شاء الله أقدر أصومه كله..

بدي أروح أطبخ لبابا خلص قرب يوصل من الدوام.. بحبك يا رموش..

خبر الحمل.. يوم لا ينسى

في يوم السبت 21 مارس 2009

تلقيت انا ووالدك أحلى خبر.. وكنتِ أحلى هدية لي في أول عيد أم لي مع والدك حفظه الله..

كنا قد قصدنا المستشفى في الليلة السابقة لمعرفة ما اذا كان قد حصل حمل أم لا..

وفي مساء السبت خرجت مع والدك وعمك لاستلام النتيجة.. وكانت أني أحمل بك منذ 4 أسابيع

"كان أحلى خبر سمعتو بحياتي يا رمووش"

بعد استلام النتيجة دعانا عمك لتناول العشاء معه في مطعم قريب.. وطوال الطريق كان والدك يبشر جديك وأقرباءنا في الأردن وهنا عن قدوم أول طفل لنا.. كانت الدنيا لاتتسع لفرحته ذلك اليوم.. أبصرت ذلك في عينيه..

الحمدلله على هذه النعمة.. نعم يا راما أنت نعمة كبيرة أنعمها الله علينا.. ولست أنا ووالدك فقط بانتظارك.. العالم كلهم يتوقون لرؤيتك..

انطلاقة راما ع الانترنت

من اليوم قررت يا راما اعمللك مدونة اكتبلك فيها كل تطورات حياتك

مشان بس تكبري تقرئيها وتعرفي أديش ماما وبابا بحبوكي

ماما