الخميس، 29 أكتوبر 2009
شكلك قربتي اتنوري حياتي
مع اني كتيــــــــــــــــــر خايفه يا رموشتي بس كمان مبسوووووطه انك قربتي اتنوري حياتي
الله يفرحني فيكي قريب يا عمري
بابا مبسوووط كتير لسه اكتر مني بستنى فيكي على احر من الجمر..
يارب تيجي بصحه وسلامه يا راما.. مع انو على حساب الدكتوره باقيلك 26 يوم بس شكلك رح اتشرفينا قبل هيك
الله يحميكي ويحفظك ويبعد عنك كل شر ويوعدني بشوفتك وانتي احلى عروس بالدنيا كلها..
بحبك
الاثنين، 19 أكتوبر 2009
اشتقتللك
باقي لموعد ولادتك 36 يوم..
قرب اليوم اللي رح احضنك فيه.. اليوم اللي رح اشوف احلى عيون بالعالم..
انا وباباتك مشتاااااقينلك كتير..
نفسي يمروا الايام بسرعه.. كل الاوجاع اللي مريت فيها واللي رح امر فيها انا متأكده اني رح انساها
اول ما افتح عيوني والاقيكي بحضني..
بحبك كتير ياراما.. كل يوم بفتح الخزانه وبطلع اواعيكي وبلعب فيهم.. نفسي خلص تيجي مشان البسك ياهم..
هاي صور اواعيكي وسريرك مشان اتضللي متذكريتهم بس تكبري
الاثنين، 31 أغسطس 2009
رمضان وحملي فيكي
مع اني بحزن عليكي بتكون حركاتك خفيفة في النهار من الجوع وبس أفطر بتعملي حفلة جوا.. يا حبيبة قلبي
اول يوم افطرنا انا وبابا عند دار سيدو ابو ايمن وانبسطنا كتيـــــــر.. بتعرفي شو احلى اشي كان في لقاءنا هاد؟
اني شفت اغراضك واواعيكي اللي تيتا بعتتلك ياهم من الاردن.. بجننوا يا ماما رح اصورلك ياهم ان شاء الله واحطهم مشان تشوفيهم بس تكبري..
مشتاقيتلك يا راما كتير.. الله يحميكي يارب ويفرحني فيكي.. ويسهل ولادتك
خايفة كتير من الولادة بس اللي مهون عليي اني قربت احضنك يا قطعة من قلبي.. احلى ما فيكي انك قطعة من احسن أب في الدنيا.. اللي بحبك كتير وبيضل يحكي معك ويلاعبك وانتي ببطني..
وامبارح واحنا بنصللي قيام ليل دعالك يا راما .. من هلا صار يدعيلك باباتك يا عيوني.. عنجد مبسوط فيكي كتير باباتك بضل يحكيلي طولت راما خلليها تيجي بسرعة..
كلنا مشتاااااااااااااقينلك يا حياتي..
الأربعاء، 12 أغسطس 2009
هدايا تيتا لأحلى راما
لأنها كتير بتحبك وكان نفسها وهيي هون اتجهز معي أغراضك بس ما صار مجال فجهزتلك من الأردن بس رجعت..
وبعتتهم مع أهلي.. وخالو اللي بحبك هو اللي نقلهم من بيت تيتا لبيت أهلي.. أنا لسه ماشفتهم الأغراض حتى تيتا أم ماماتك لسه ما فتحتهم بعد بكرا ان شالله رح يوصلوا ع الامارات دار سيدو أبو ماما وأشوفهم وأشوف أغراضك.. مشتااااااقة كتير أتفرج ع أواعيكي يا راما ومشتاقة أكتر ألبسك ياهم..
كل يوم الصبح صايرة حبيبتي راما اتصحيني بحركاتها وركلاتها الترجيحية.. حضرتك خايفة يطلع باباتك حبيبك بدون فطور.. بس يرن المنبه الصبح بكون صاحية بسببك أصلاً يعني مش محتاجة منبه يصحيني..
وطبعاً غير لما أغلط وأنام ع بطني بتدفشيني دفشات بتخلليني أحرم أقلب ع بطني طول الوقت.. بس أحياناً لما اتطولي غيبتك عني وبوكساتك المحببين لقلبي بنام ع بطني مشان تصحي وتلعبي معي لعبتنا..
عنجد أنا كتير بحبك يا راما انتي وأبوكي أغلى ناس في الدنيا ع قلبي.. ربي لا يحرمني منكم يارب..
الاثنين، 10 أغسطس 2009
ذكريات من بداية حملي فيكي..
كنت ما أقدر آكل إشي.. ودايماً مرهقة وتعبانة ومرمية في السرير..
طبعاً كل صورك اللي كنا نعملهم عند دكتورتي اللي براجع عندها محتفظة فيها.. رح أفرجيكي ياهم بمرة لحالهم..
جية تيتا عندنا ع أبوظبي
قبل حوالي أسبوع روحت تيتك أم بابا من عنا قعدت عندنا عشرين يوم بالزبط بس كانوا أيام حلويييييييييين كتير
حاولت اتعلمني أعمللك أواعي بالصوف والسنارة"كروشيه" بس ماعرفت.. بس هيي عملتلك أشياااااء كتير حلوة..
أهمهم هاد الفستان اللي ان شاء الله رح ألبسك ياه ع عيد الأضحى اذا ضل موعد ولادتك زي ما بتحكي الدكتورة ب24-11-2009
طبعاً كنتي اتحبي صوت تيتا كتيــــر بس اتكون بتحكي معي كأنك كنت اتميزي صوتها اتصيري تتحركي حركات كتير واضحة زي كأنك بترقصي ببطني..
رقصات ودبكات القمر راما
حركاتك هاي قربت مابيني وبينك كتير ياراما.. صار في بيني وبينك لغة تخاطب معينة بس أشتاقلك وأحسس ع بطني بطريقة معينة كنتي اتردي عليي بركلة أو رقصة حلوة وبابا كمان كان يلاعبك مرات هاي اللعبة.. بس مش دايماً بتردي عليه أعتقد إنك بتكوني نايمة بس يلاعبك حبيبك بابا..
يومياً كنت اتابع تطوراتك في بطني عن طريق هاد الشريط..
طبعاً زي ما امبين بالشريط انتي هلا بالاسبوع ال24 و6 أيام بعد أسبوعين بتدخلي المربع السابع يعني بصير بالشهر السابع ورح اتكون الدنيا رمضان مش عارفة شو رح يصير في رمضان بس ان شاء الله أقدر أصومه كله..
بدي أروح أطبخ لبابا خلص قرب يوصل من الدوام.. بحبك يا رموش..
الأحد، 9 أغسطس 2009
خبر الحمل.. يوم لا ينسى
انطلاقة راما ع الانترنت
مشان بس تكبري تقرئيها وتعرفي أديش ماما وبابا بحبوكي
ماما